Бөлүмдөр
Ишемби, 24-август
Ош облусуКара-Суу району 30.07.2019 14:55

Кара-Сууда Россиядан алынып келген жүгөрү жана күн караманын жаңы сорттору өстүрүлүүдө (сүрөт)

Turmush -  Кара-Суу районунда Россиядан алынып келген жүгөрү, соя жана күн караманын жаңы сорттору өстүрүлүүдө. Бул тууралуу бүгүн, 30-июлда Кара-Суу районунун Калинин айылында Ош облусунун 5 районунан келген фермерлердин катышуусунда өтүп жаткан «Талаа күнүндө» белгилүү болду.

«Талаа күнү» бейөкмөт уюмдардын жана Россия Федерациясынын Кыргызстандагы элчилигинин Ош облусундагы өкүлчүлүгү менен биргеликте уюштурулуп, ага 300дөн ашуун фермер катышууда. Кара-Суу районунун агрардык өнүктүрүү бөлүмүнүн башчысы Кубанычбек Мамбетов иш-чара тууралуу буларга токтолду.

«Иш-чаранын негизги максаты — дыйкан, фермерлерди колдоп, эски дан эгиндеринин сортторун жаңылап, түшүмү мол боло турган жаңы дан эгиндерин таратуу. Кара-Суу, Өзгөн, Ноокат, Араван, Кара-Кулжа райондорунан келген дыйкандарга күн карама, жүгөрү, соянын жаңы 60 сорту тууралуу маалымат берилип, аны эгүү, кароо ыкмалары боюнча түшүндүрүү иштери жүргүзүлдү. Алардын уруктары Кара-Суу районунун айыл чарба департаментинин жерине эгилген.

Келечекте жүгөрүнүн 12 түрүн 10 миң 145 гектар жерге эгип, гектарынан 13-15 тонна түшүм алуу пландалууда. Соянын 5 түрүн 210 гектар жерге эгип, 1 гектардан 4-5 тонна түшүм алуу пландалууда. Ал эми күн караманын 3 түрүн 95 гектар жерге эгип, 1 гектар жерден 5-6 тонна түшүм алуу күтүлүүдө. Мындан сырткары дан эгиндерин дарылоо үчүн агродрон алынып келген. Анын жардамы менен 1 гектар жерге 800-1200 сомго дары чачып, кызмат көрсөтүлүүдө. Агродрон үчүн 1 гектарга 20 литр дары сарпталат. З айдын ичинде аны менен 650 гектар жерге дары себилди. Агродрондон дагы экөө алынып келинет», - деди Кубанычбек Мамбетов.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×